५१. काय आह्मी भक्ति करणें कैसी । काय एक वाहावें तुह्मांसी ॥
अवघा भरोनि उरलासी । वाणीं खाणीं रसीं रुपीं गंधीं ॥१॥
कसें करुं इंद्रियां बंधन । पुण्यपापाचें खंडण ॥
काय व्रत करुं आचरण । काय तुजविण उरलें तें ॥२॥
काय डोळे झांकुनियां पाहूं । मंत्रजप काय ध्याऊं ॥
कवणे ठायीं धरुनि भाव । काय तें वाव तुजविण ॥३॥
काय हिंडों कवण दिशा । कवणे ठायीं पाव ठेवूं कैसा ॥
काय तूं नव्हेसि न कळे तैसा । काय मी कैसा पाहों आतां ॥४॥
तुझिया नामाचि सकळ । पूजा अर्चन मंत्र माळ ॥
धूप दीप नैवेद्य फळ तांबूल । घेऊं पुष्पांजुळ तुका ह्मणे ॥५॥