६१. षड्गुण ऐश्वर्य संपत्ति । धीर उदार तूं श्रीपति ॥
परम कृपाळ परंज्योति । चरित्र कीर्ति काय वाणूं ॥१॥
जन्मोजन्मीं सुकृत राशी । गाई चारी संरक्षणेसी ।
मयुरपिच्छ मोरविशी । गोपाळांसी दाखवी ॥२॥
वत्सें गोप ब्रह्मयानें । सत्य लोका नेले चोरुन ॥
भक्तवत्सल भगवान । झाला आपण दो ठायीं ॥३॥
वत्सें वत्सप गाई होऊन । आपुलें दाविलें महिमान ॥
ब्रह्मादिकां न कळे खूण । परीपूर्ण पांडुरंगा ॥४॥
शेवटीं नीच काम करिसी । पांडवांचा पक्षपाती होसी ॥
गिळोनी अघासुरासी । बकासुरासी चिरोनी ॥५॥
वत्सासुरासी रगडीलें । तट्टू खेटुनी मारिलें ॥
गाडा दृष्टीनें भंगिलें । विमळार्जुन रांगतां ॥६॥
खाऊनी तांतडी भाजीपान । तृप्त केले ऋषीजन ॥
तुका ह्मणे आतां मी दीन । कांहीं वचन बोलावें ॥७॥
