६०. विठ्ठल जिवाचा सांगाती । विठ्ठल वसे सर्वाभूतीं ॥
विठ्ठल दिसतसे सुषुप्ती । स्वप्न जागृती विठ्ठल ॥१॥
विठ्ठल सर्वांचा आधार । विठ्ठल मुक्तीचें माहेर ॥
विठ्ठल साराचें ही सार । विश्वाधार विठ्ठल ॥२॥
विठ्ठल साधन परब्रह्म । विठ्ठल कैवल्याचें धाम ॥
विठ्ठल नाम परम ॥ हरती श्रम जन्माचे ॥३॥
विठ्ठल सर्वस्वें उदार । उभारिला अभयकर ॥
रुक्मादेवीस्वामीवर । करुणाकर विठ्ठल ॥४॥
विठ्ठल सकळांचा दाता । विठ्ठल सर्वा आधीष्ठाता ॥
विठ्ठल भर्ता आणि भोक्ता । विठ्ठल दाता दिनाचा ॥५॥
विठ्ठल गुणांचा गुणनिधी । विठ्ठल करुणेचा उदधि ॥
विठ्ठल माझी सर्व सिद्धी । विठ्ठल विधी विधान ॥६॥
विठ्ठल जिवाचा हा जीव । विठ्ठल भावाचाही भाव ॥
तुका ह्मणे गुणार्णव । देवादेव विठ्ठल ॥७॥