५२. शरीर दु:खाचें कोठार । शरीर रोगाचें भांडार ॥
शरीर दुर्गंधीची थार । नाहीं अपवित्र शरीरा ऐसें ॥१॥
शरीर उत्तम चांगलें । शरीर सुखाचें घोंसुलें ॥
शरीरें साध्य होय केलें । शरीरें साधलें परब्रह्म ॥२॥
शरीर विटाळाचें आळें । मायामोहपाशजाळें ॥
पतन शरीराच्या मुळें । शरीर काळें व्यापिलें ॥३॥
शरीर सकळ हें शुद्ध । शरीर निधींचा ही निध ॥
शरीरें तुटे भवबंध । वसे मध्यें भोगी देव शरीरा ॥४॥
शरीर अविद्येचा बांधा । शरीर अवगुणाचा रांधा ॥
शरीरीं वसे बहुत बाधा । नाहीं गुण सुदा एक शरीरीं ॥५॥
शरीरा सुख नेदावा भोग । न द्यावें दु:ख न करीं त्याग ॥
नव्हे वोखटें ना चांग । तुका ह्मणे वेग करीं हरि भजनीं ॥५॥